拜年吃碗炒米茶
来自:浙江
P> 老底子过年，城里乡下家家人家呆板要爆一升炒米。一到年夜脚边，弄堂弄下，爆米机“轰轰轰”响格勿断头。东栅会龙桥堍顶闹热，桥北“轰”叫一记，桥南跟牢响一记，好像隔河打炮比赛。小把戏顶开心，登勒格爆米机摊头边廊叽哩喳啦扎闹猛，等到爆米摊主高喊一声“响喽———”格辰光，伊拉捂牢耳朵照样勿逃。“轰”一下子雾气腾腾，小人勒气雾里施脚施手，像煞腾云驾雾得呈煞哩。年头郎，亲亲眷眷走来走去做客人，东家出西家进，今朝大伯啦，明朝小姨啦，好像排好队勒介，啥人家勿去，人家要勿开心。其实忙来忙去正式吃格呒啥花头，老古话讲“拷鱼拨肉捞粉皮”，大家看重格是人情面子。不过，客人进门，主人家头一桩事体不会怠慢，格就是泡碗炒米茶，格是嘉兴上百年的老规矩。主人挪只蓝边饭碗，好人家用金边碗，或者带盖格茶碗，抓两把炒米，拿调钩舀点白砂糖，捧起竹壳热水壶倒点开水一冲，喔唷，香气一阵阵冲到鼻子管里。客人接过茶碗，焐勒手里暖热同同，吃起来么甜津津。老早格辰光买糖要凭票子，一家人家便得几两，平常勿舍得吃，过年待客人派上大用场，实在呒么糖，只好放点糖精。年头郎天冷丝丝，一碗百热沸烫格炒米茶正勒好头郎，一口气一塌刮子吃到肚皮里，格么叫适意。
爆炒米是跑昔子格冻干米变过来格。冻干米茶还要好吃，不过做冻干米蛮讨厌。吾奴小辰光看伢娘做过，讲起来有点烦，先么勒腊月格辰光，挪糯米浸勒水里厢；六七天后出水，放勒饭窝头郎蒸熟；那么摊勒竹扁里，夜来头摆勒露天让伊冻一冻；再么慢慢叫一点点扒碎来，连牢晒几个大热头，一直晒到伊津干腊燥，冻干米格么算做好哩。年三十夜来头，炒好南瓜子、向日葵、发芽豆，还要炒冻干米。炒格辰光火头勿要忒烫，用柴草结火钳压牢茄火烧。炒到冻干米变黄兮兮就好哩。等伊冷透，坑到洋铁桶桶里，到了年头郎，泡拨客人吃。冻干米茶香是香到格来呒啥话头，还加伊有嚼头，勿像爆炒米有点糊沓沓，着实比伊好吃交交关。
有是爆炒米，冻干米慢慢叫就呒么人做哩，格辰光就连深乡下，勿晓得会有人做伐。闲话讲回来，汽车一通，乡下街廊还勿是一样哩。今朝是连爆炒米勒街廊蛮难看见哩。
过年吃碗炒米茶，格是一种传统习俗，日脚好起来，吃茶吃出花头来哩，格样给样，名堂木栳佬。茶馆也叫茶吧、茶坊哩，啥格咖啡茶、柠檬茶、珍珠奶茶……话也话勿清爽。有格杯子口郎插把小纸伞，有趣煞哩。还有自助茶，各式各样茶点多是多到来海万，让乃从点心辰光吃到夜来头，一直吃到肚皮涨煞。
新年新势，讲究讨个好口彩。炒米茶异香异甜异便宜，吃格是一份顶顶实在格乡情民意，伊保佑来年格日脚热气腾腾甜滋滋。过咯介（所以），有常时吾呆想想，已经好几年勿吃着炒米茶哩。假使年头郎茶馆里有炒米茶，保勿定蛮会受茶客欢迎，连吾也会叫上两个要好朋友去吃吃看哩。（注：本文以嘉兴话写成，个别文字纯以土音而附会。）
